Rusiya və Ukrayna Antalyada görüşə razılaşdı – XİN başçıları görüşdə Çavuşoğlunun da iştirakını istədilər

Türkiyə xarici işlər naziri Çavuşoğlu Antalyada Ukrayna və Rusiya nazirləri ilə üçtərəfli görüş təşkil edəcəklərini açıqlayıb.

Çavuşoğlu Rusiyanın xarici işlər naziri Sergey Lavrov və Ukraynanın xarici işlər naziri Dmitro Kulebanın Antalyada görüşəcəyini deyib.

"İki tərəfi bir araya gətirmək üçün gərgin iş gördük. Dünən prezidentimiz Putinlə görüşündə bu məsələni dilə gətirdi. Lavrov görüşə hazır olduğunu bildirdi. Ukrayna xarici işlər naziri də görüşdə iştirak edəcəyini bizə bildirdi. Hər iki nazir mənim də görüşdə iştirak etməyimi istədilər, üçtərəfli görüş olacaq. Görüşü 10 mart cümə axşamı Antalyada keçirəcəyik. Bu görüşün dönüş nöqtəsi olacağına ümid edirik" Çavuşoğlu bildirib.