BİHK hüquq-mühafizə orqanlarını jurnalistə qarşı hücumu obyektiv şəkildə araşdırmağa çağırır

Bakı İnsan Hüquqları Klubu İctimai Birliyi (BİHK) 08 may 2022-ci il tarixdə axşam saatlarında jurnalist Aytən Məmmədovaya qarşı yaşadığı binada hücumdan narahatlığını ifadə edir.

Jurnalistin yaşadığı binanın liftində naməlum şəxs tərəfindən bıçaq istifadə edilməklə fiziki zorakılığa məruz qalması və peşə fəaliyyəti ilə əlaqədar hədələnməsi faktı Azərbaycan Respublikasının qanunvericiliyinə uyğun olaraq obyektiv, tam və hərtərəfli şəkildə araşdırılmalı, təqsirkar şəxs və ya şəxslər müəyyən edilərək cinayət məsuliyyətinə cəlb edilməlidirlər. Araşdırma yalnız fiziki qəsdlə məhdudlaşmamalı, jurnalistin hədələnmə səbəbləri və işin motivi müəyyən edilməlidir. 

BİHK ölkənin hüquq-mühafizə orqanlarını məsələyə diqqətlə yanaşmağa və işin açılmasını təmin etməyə çağırır. 

Qeyd edək ki, bu gün səhər polis Məmmədovadan hadisə ilə bağlı ifadə alıb.