Türkiyəli mütəxəssislər FHN-də tibb heyət üçün təlim keçib (foto)

17-22 iyul 2023-cü il tarixlərində Azərbaycan və Türkiyə arasında iqtisadi əməkdaşlıq üzrə birgə Hökumətlərarası Komissiyanın 9-cu iclasının Protokolu və Fəaliyyət Planının 2-ci Əlavəsinin 113-cü maddəsinə əsasən Türkiyə Respublikasının Səhiyyə Nazirliyinin Milli Tibbi Xilasetmə Dəstəsi (UMKE) və Fövqəladə Hallar Nazirliyi arasında əməkdaşlığın davamı olaraq Fövqəladə Hallar Nazirliyinin bir qrup tibbi heyəti, Azərbaycan FHN-in Beynəlxalq Axtarış-xilasetmə Dəstəsinin üzvləri və Tibbi Ərazi Bölmələrini İdarəetmə Birliyinin (TƏBİB) tabeliyində olan tibb müəssisələrinin nümayəndələri üçün UMKE mütəxəssisləri tərəfindən ölkəmizdə növbəti təlim keçirilib.

“Four Seasons Hotel Baku” otelində baş tutan tədbirin açılış mərasimində UMKE Təlim üzrə idarə rəisi Mustafa Uras, FHN Baş Əməliyyat idarəsinin rəis müavini polkovnik Ələsgər Əliyev, FHN Tibb Mərkəzinin rəisi polkovnik Xanım Sofiyeva, Ümumdünya Səhiyyə Təşkilatının Azərbaycan ofisininin nümayəndəsi Cəvahir Süleymanova və Cənubi Qafqaz üzrə nümayəndəsi Nuran Higgins çıxış edərək içtirakçılara uğurlar arzulayıb, təlimin prioritetləri və gələcək əməkdaşlıq barədə məlumat veriblər.

Açılış mərasimindən sonra təlimə start verilib. Təlim nəzəri və praktiki hissələrdən ibarət olub. Təlimin nəzəri hissəsində türkiyəli mütəxəssislər məşğələlər formasında bilik və bacarıqlarını azərbaycanlı həmkarları ilə bölüşüblər.

FHN-in Mülki müdafiə qoşunlarının Təlim poliqonunda keçirilən təlimin praktiki hissəsində tibb heyətinə dağıntı və sair fövqəladə hallar zamanı zərərçəkmişlərə ilkin tibbi müdaxilə və yaradılmış səhra xəstəxanalarında əməliyyat barədə praktiki biliklər verilib.

Təlimin bağlanış mərasimi Fövqəladə Hallar Nazirliyinin Mülki müdafiə qoşunlarının Təlim poliqonunda baş tutub. Mərasim zamanı iştirakçı tibbi heyət müvafiq sertifikatlarla mükafatlandırılıb.