Moskva ətrafında üç PUA vurulub

Yeni Moskva və Moskva vilayətlərində radioelektron mübarizə vasitələrinin köməyi ilə üç dronun vurulduğu xəbər verilir.

Globalpress.az- ın məlumatına görə bu barədə TASS dövlət xəbər agentliyi hüquq-mühafizə orqanlarına istinadla məlumat verib.

Dronlardan biri Lukino kəndi yaxınlığında düşərək partlayıb. Daha iki dronun qalıqları Naro-Fominsk rayonunda aşkar edilib.



Dronlar Taman diviziyasının 15-ci motoatıcı alayının yaxınlığında düşüb.

Moksvaətrafı regionun qubernatoru Andrey Vorobyev iki dronun Naro-Fominsk şəhər dairəsinin Kalininets qəsəbəsinin yaxınlığında “hərbi hissələrdən birinin anbarlarına” doğru uçarkən düşdüyünü təsdiq edib.

Dağıntı və itki olmadığı xəbər verilir. Qubernator yazır ki, hüquq-mühafizə orqanları sözü gedən ərazini bağlayıblar.

Rusiyanın Ukraynaya müdaxiləsindən sonra Rusiyanın regionlarına müntəzəm olaraq dron hücumları edilir.

Bunlardan bəziləri dağıntılara və insan tələfatına səbəb olub. Mayın 30-da Moskvaya və Moskvaətrafı regiona dron hücumu baş verib. Dronlardan üçü yaşayış evlərini vurub, qalanlarının isə vurulduğu iddia edilib.

Moskvaya hücum edən dronlardan birinin Vladimir Putinin Novo-Oqoryovadakı iqamətgahının yaxınlığında düşdüyü xəbər verilmişdi. Moskva bu hücumlara görə Ukraynanı ittiham edir. Kiyev bir qayda olaraq belə xəbərləri şərh etmir.