Astana üçlüyü“ Suriyadakı vəziyyəti müzakirə etdi

Rusiya, İran və Türkiyə Türkiyənin Suriyanın şimalında mümkün əməliyyatını müzakirə ediblər.





" RİA NOVOSTİ " xəbər verir ki, bu barədə Rusiya Federasiyası prezidentinin Suriya nizamlanması üzrə xüsusi nümayəndəsi Aleksandr Lavrentyev məlumat yayıb.

“Məsləhətləşmələr davam edir. Dünən kifayət qədər intensiv təmaslarımız oldu, demək olar ki, bütün nümayəndə heyətləri ilə - İran və Türkiyə nümayəndə heyətləri ilə danışdıq. Əsas diqqət, təbii ki, Türkiyənin Suriyada hərbi əməliyyat keçirmək niyyətinə yönəldilib”, - deyə Lavrentyev vurğulayıb.

Onun sözlərinə görə, Rusiya tərəfi Ankaranı zorakılığa əl atmadan problemi sülh yolu ilə həll etməyə inandırmağa çalışıb.

İndi tərəflər yekun bəyanatın parametrləri ilə bağlı razılığa gəlirlər. Bundan əlavə, müşahidəçilər - Livan, İraq və İordaniya nümayəndələri ilə də məsləhətləşmələr aparılacaq.

Daha əvvəl Kremlin sözçüsü Dmitri Peskov bildirib ki, Moskva Türkiyənin yeni əməliyyatının Suriyanın sabitliyinə və təhlükəsizliyinə töhfə verməyəcəyinə əmindir. Rusiya prezidentinin mətbuat katibinin sözlərinə görə, Türkiyənin yeni xüsusi əməliyyatı Suriya Ərəb Respublikasının təhlükəsizliyinə zərbə vura bilər.