Rusiya "denasifikasiya" tələbini Ukraynadan öncə Ermənistana niyə aid etmədi - Njde, Dro, Bender eyni deyillərmi?.. Siyasət1 Mar. 16:30

Kremlin mətbuat xidməti Rusiya prezidenti Vladimir Putinin fransalı həmkarı Emmanuel Makronla danışığının təfərrüatlarını açıqlayıb.

Putin Makronla telefon danışığı zamanı bildirib ki, Ukrayna ətrafında nizamlanma yalnız Rusiyanın qanuni təhlükəsizlik maraqları qeyd-şərtsiz nəzərə alınarsa mümkündür:

"Vladimir Putin vurğulayıb ki, belə bir nizamlanma yalnız Rusiyanın qanuni təhlükəsizlik maraqlarının qeyd-şərtsiz nəzərə alınması, o cümlədən Rusiyanın Krım üzərində suverenliyinin tanınması, Ukrayna dövlətinin demilitarizasiyası və denasifikasiyası vəzifələrinin həlli və onun neytral statusunun təmin edilməsi ilə mümkündür”.

Maraqlıdır ki, bunun ardınca Ukrayna tərəfi müharibənin dayandırılması ilə bağlı şərtlərini açıqlayıb. Zelenski bəyan edib ki, bunun üçün Rusiya Krım və Donbası tərk etməlidir. İrəli sürülən şərtləri heç bir tərəf qəbul etməyəcək. Bu şərtlər qəbul edilsəydi heç müharibə də olmazdı. Maraqlıdır ki, Rusiyanın irəli sürdüyü şərtlərin arasında Ukrayna dövlətinin denasifikasiyası da yer alır. Yəni demək istəyir ki, Ukrayna və onun hakimiyyəti neofaşist ideologiyalı adamlardan təmizlənməlidir. Putin hesab edir ki, Ukraynada faşistlərin tərəfdarı olan Benderə böyük ehtiram göstərilir. Maraqlıdır, Putin bu tələbi Ermənistanla bağlı niyə irəli sürmür? Həmin ölkədə faşistlərin adına küçə verilir, onlara heykəllər qoyulur. Müvəkkil Hüquq Mərkəzinin sədri, hüquq müdafiəçisi Səməd Vəkilov “Bakı-Xəbər”ə bildirdi ki, Putinin irəli sürdüyü təkliflər sırasında neofaşizmlə bağlı müddəa da var: “Beynəlxalq hüququn qəbul etdiyi prinsiplərə görə, insan haqları və digər fundamental azadlıqlarla bağlı məsələ heç bir ölkənin daxili işi deyil. Ukraynanın da qoşulduğu beynəlxalq konvensiyalar faşizmlə bağlı təbliğatı qadağan edir. Bu hallar pozularsa dünya birliyinin mövzuya müdaxilə etmək kimi hüququ yaranır. Bu xüsusda Putinin Ukrayna ilə bağlı irəli sürdüyü müddəa ideoloji məsələdıir və təsdiqini tapmır. Putin burada öz siyasi məqsədlərini həyata keçirmək üçün ideoloji tələbdən sui-istifadə etmyə çalışır. Bu, hüquqa ziddir. Ukrayna ilə bağlı belə sübutlar olsaydı, çoxdan onları nümayiş etdirərdilər. Buna görə də, tələbin əsası yoxdur. Putin yaxşı olardı ki, bu tələbi Ermənistanla bağlı irəli sürəydi. Orada Njdeyə, Droya və başqa faşistlərə açıq ehtiram göstərilir. Azərbaycan dəfələrlə bu faktı qaldırıb. Ortaya konkret sübutlar da qoyub. Ancaq Rusiya bu istiqamətdə heç bir əməli tədbir görməyib. Bu bir daha Rusiyanın məsələyə ikili yanaşmaslndan xəbər verir. Bu baxımdan da, Putinin məlum tələbinə siyasi manipulyasiyadan başqa ad vermək olmaz”.