Səbuhi Məmmədliyə əlillik təyin olundu

Noyabrda ayağı amputasiya olunan tanınmış jurnalist Səbuhi Məmmədliyə əlillik təyin edilib.

Globalpress.az xəbər verir ki, bu barədə Dövlət Tibbi-Sosial Ekspertiza və Reabilitasiya Agentliyindən Cebhe.info-nun sorğusuna cavab olaraq məlumat verilib.

Bildirilib ki, Bakı şəhər sakini Məmmədov Səbuhi Məhəmməd oğluna Bakı Baş Səhiyyə İdarəsi tərəfindən e-sistemə daxil edilən forma 88-ə əsasən Dövlət Tibbi-Sosial Ekspertiza və Reabilitasiya Agentliyi tərəfindən 14.07.2023-ci il tarixində orqanizm funksiyalarının 100% pozulması halı müəyyən edilərək əlillik təyin edilib.

Bundan sonra Səbuhi Məmmədov əlillik səviyyəsinə uyğun sosial ödənişlərlə, eləcə də, reabilitasiya və protez-ortopedik xidmətlərlə təmin ediləcək.

Xatırladaq ki, ötən ilin noyabrında ayağı amputasiya olunan tanınmış jurnalist Səbuhi Məmmədov mətbuata açıqlamasında hələ də protez ala bilmədiyini deyib.

TƏBİB-in açıqlamasına görə, tanınmış jurnalist Səbuhi Məmmədov uzun müddətdir ki, şəkərli diabet xəstəliyindən əziyyət çəkir. 15 nömrəli Şəhər Poliklinikasında dispanser qeydiyyatındadır.

"Onda şəkərli diabet, ürək çatışmazlığı, ağciyərin aşağı payında pnevmoniya, aşağı ətrafların qan damarı mənşəli ağırlaşmış xroniki xəstəliyi qeydə alınıb” – açıqlama bildirilib.