İran Azərbaycan və Ermənistan XİN başçılarını Tehranda 3+3 formatında görüşə DƏVƏT ETDİ

İran Ermənistan və Azərbaycanın xarici işlər nazirlərini Tehranda 3+3 formatında görüşə dəvət edib.
Globalpress.az xəbər verir ki, bu barədə İranın xarici işlər naziri Əmir Abdullahian Rusiya xarici işlər nazirinin müavini Aleksandr Qruşko ilə görüşündə deyib.


O, İranın Tehranda Azərbaycan, Rusiya, Türkiyə, Gürcüstan və Ermənistan xarici işlər nazirləri ilə 3+3 formatında görüş keçirməyə hazır olduğunu bildirib.

Həmsöhbətlər ikitərəfli, regional və beynəlxalq səviyyədə əməkdaşlığın inkişaf etdirilməsinin vacibliyini qeyd ediblər.

Xatırladaq ki, 2022-ci il noyabrın sonunda Abdullahian bəyan edib ki, İran Azərbaycan və ya Ermənistanla münasibətlərini qarşı tərəfin hesabına qurmur.

“Biz Azərbaycan və Ermənistanı İranın iki qonşusu hesab edirik və heç vaxt bir tərəflə münasibətlərimizi digər tərəfin hesabına şərh etmirik. Bizim prioritetimiz bütün qonşularla münasibətlərdir. Bizim qonşu dövlətlərin, o cümlədən Azərbaycanın torpaqları ilə bağlı heç bir planımız yoxdur. Amma biz Qafqaz regionunun bütün aktorlarına açıq şəkildə bildirmişik ki, İran regionda istənilən geosiyasi dəyişikliyə cavab verəcək”, – deyə İran XİN rəhbəri vurğulayıb.