Abituriyentlər imtahan öncəsi niyə gərginlik keçirir və valideynlər belə halların olmaması üçün nələri bilməlidir?

Abituriyentlər imtahan öncəsi niyə gərginlik keçirir və valideynlər belə halların olmaması üçün nələri bilməlidir?
Uğurlu gələcək qurmaq üçün təhsil almaq vacibdir. Lakin Azərbaycanda bu məsələyə yanaşma birmənalı deyil. Çünki abituriyentlərin əksəriyəti qəbul imtahanlarını təhsilin ilk pilləsi kimi yox, dünyanın sonu olaraq qəbul edir. Bir çoxları imtahan öncəsi ağır stress və panika yaşayır. Bəs görəsən bu sahədə hansı maarifləndirmə işlər görülməlidir? Abituriyentlərin valideynləri belə halların baş verməməsi üçün nələri bilməlidir?

Mövzu ilə bağlı Globalpress.az-a danışan təhsil eksperti Kamran Əsədov bildirib ki, abituriyentlərə imtahan öncəsi valideyn tərəfindən psixoloji dəstək çox önəmlidir: “Əslində təkcə övladlar imtahan vermir. Onlarla bərabər valideynlər də imtahan verir. Çünki, bir-iki il ərzində valideyn övladını izləyir, onu müşahidə edir, özünü imtahanın içindəki kimi görür. Böyüklər çalışmalıdır ki, övladına dəstək olsun və onun əsəb sisteminin pozulmasına imkan verməsin. Yəni, valideyn övladını müşahidə edərkən ona dəstək göstərməlidir. Abituriyent üçün önəmli faktorlar məsuliyyət, diqqət və çalışqanlıqdır. Şagirdlər diqqət etməlidir ki, valideyn onun məsuliyyətsizliyini, diqqətsizliyini, panikliyini, tələskənliyini görüb aqressiv münasibət yaratmasın. Bəzən bir qrup abituriyentlərdə bu kimi hallar müşahidə olunur. Valideyn bu halda təbii narahatlıq keçirir. Həmin narahatlığı şagirdin üzərinə gedərək deyil, onunla söhbət apararaq aradan qaldırmaq mümkündür. Valideyn övladına dəstək olmaq üçün ən azı həftədə bir dəfə, yaxud heç olmasa ayda 2-3 dəfə gəzintiyə aparmalı, onunla söhbət edərək problemlərini dinləməlidir”.

Kamran Əsədov: Sizin qızınız varmı?

Ekspert bildirib ki, sınaq imtahanlarında uğursuz nəticə əlddə edən şagirdlərin valideynləri əsəbiləşir, amma bu düzgün deyil: “Valideyn övladının uğursuzluğuna əsəbləşir, sınaq imtahanlarında az bal topladığından narahatlıq keçirir. Bunun səbəbini bir anda deyil, yavaş-yavaş, qarşılıqlı söhbət edərək öyrənmək lazımdır. Bəzən abituriyentlər zəif nəticə əldə etdikdən sonra elə düşünürlər ki, bir daha yüksək bal toplaya bilməyəcəklər və valideynləri onlara təzyiq göstərəcək. Lakin ruhən haldan düşmək, həvəssiz olmaq doğru deyil. Bu zaman valideynlər övladlarına kömək etməlidir. Bəzi valideynlər isə övladından çox şey istəyir. Məsələn, imtahanda 300 bal toplayan abituriyentdən 600 bal gözləyir. Valideynlərin 2 il müddətində hazırlaşaraq sınaq imtahanlarından 200-300 bal toplayan abituriyentdən 600 bal gözləməsi düzgün deyil. Deməli həmin uşaq zaman-zaman çalışmalı, hazırlaşmağı vərdiş halına gətirməlidir. İmtahan ərəfəsində evdə gərginlik yaranmamalıdır. Ailədə sistematik hay-küy, qalmaqal, davamlı abituriyenti qınamaq, onu pərt etmək olmaz. Ailə övladına ruh yüksəkliyi, nikbinlik verməlidir. Valideyn özünü uşağının yerinə qoyaraq bunun çox çətin bir proses olduğunu qəbul etməli və övladını hazırlamalıdır”.