Vətəndaş problemi

Oktyabr ayının sonlarında paytaxta yağan yağışlar bir sıra fəsadlara səbəb olmuşdur. Güclü yağışların yaratdığı fəsadların aradan qaldırılması ilə əlaqədar FHN-nin qüvvələri tərəfindən Bakı və Abşeron rayonu ərazisində müvafiq işlər görülmüşdür. Bəzi yerlərdə suyun çəkilərək ərazidən kənarlaşdırılması davam etdirilirdi. Yağış suları paytaxtın bir sıra ərazilərində evlərin həyətlərinə, zirzəmilərinə, hətta yaşayış evlərinin içərisinə daxil olaraq sakinlərin həyatını iflic edib, sakinlər üçün dözülməz vəziyyət yaratmışdı.
Belə bir dözülməz vəziyyətlə Bakı şəhəri, Xəzər rayonu, Binə qəsəbəsi, Bakavtomat yolu deyilən(Bakavtomatın arxası) ərazidə yaşayan Piriyev Zaur üzləşmişdi.
Yaşayış sahəsinə dolan suyu FHN-nin əməkdaşları çəksə də , yaranan fəsadlar hələ də aradan qaldırılmayıb. Aşağıdakı videolarda yağışın yaratdığı fəsadlar görüntülənib. Vətəndaş bildirir ki, yerli bələdiyyəyə, ərazi nümayəndəliyinə, Xəzər Rayon İcra Hakimiyyətinə müraciət etsə də problem həllini tapmayıb. "Xəzər RİH-də məni heç qəbul etmədilər. İcra hakimiyyətindən həmin əraziyə gələn nümayəndə nəsə yazıb getdi, amma bu günə qədər heç bir səs-səmir yoxdur. Nümayəndə mənə dəymiş zərərin hesablandığını bildirdi və tezliklə sizinlə əlaqə saxlanılacaq desə də, hələ də xəbər yoxdur. Mənim problemim həllini tapmayıb. Mənim problemim həll olunmadığı üçün məsələni ictimailəşdirilməsini istədim. Buradan əlaqədar orqanlardan xahiş edirəm ki, problemin həllini tapsın və mənə dəymiş zərər ödənilsin"