Alyans münaqişə tərəfi deyil

Alyans ölkələri hətta ayrıca olaraq öz qoşunlarını Ukraynaya göndərsə belə, bu, bütövlükdə NATO-ya təsir edəcək..."

"Xarici hərbi missiya Rusiyanın hücumları üçün potensial hədəf olacaq..."

NATO öz qoşunlarını Ukraynaya göndərməyi planlaşdırmır və Alyans münaqişə tərəfi deyil.
Globalpress.az xəbər verir ki, bu barədə NATO-nun baş katibi Yens Stoltenberq bəyan edib.

Beləliklə, NATO-nun baş katibi müttəfiqlərinin Ukraynada öz hərbçilərini yerləşdirməyi istisna etməməli olduğu barədə Makronun bəyanatını dəstəkləməyib.

Onun sözlərinə görə, hətta Alyans ölkələri ayrıca olaraq öz qoşunlarını Ukraynaya göndərsə belə, bu, bütövlükdə NATO-ya təsir edəcək, çünki onun üzvləri kollektiv müdafiə paktı ilə bir-birilə bağlıdır.

O, həmçinin Makronun Qərb qoşunlarının yerləşdirilməsi ilə bağlı "strateji qeyri-müəyyənlik"dən danışarkən səhvə yol verdiyinə eyham vurub.

"Hesab edirəm ki, biz məsləhətləşmələr aparmışıq və bizim bu mühüm məsələlərə ümumi yanaşmamız olub, çünki bunların hamımız üçün əhəmiyyəti var", - Stoltenberq deyib.

Bu günlərdə Fransa XİN Ukraynada NATO qoşunları barədə yeni bəyanatla çıxış edib. Nazir Stefan Sejurnenin sözlərinə görə, Ukraynaya necə kömək etməyi Rusiya müəyyən etməməlidir.

Dipomatın sözlərinə görə, Ukrayna NATO-dan qoşunlar deyil, döyüş sursatları göndərməyi xahiş edib, lakin "biz yaxın aylarda heç nəyi istisna etmirik".

Bundan öncə Britaniya XİN rəhbəri Devid Kemeron hətta məşqlər üçün Ukraynaya qoşun göndərilməsini istisna edib.

O, qeyd edib ki, xarici hərbi missiya hətta ukraynalıları məşq etdirsələr belə Rusiyanın hücumları üçün potensial hədəf olacaq.

Bundan öncə həmçinin xəbər verilib ki, İtaliya Müdafiə Nazirliyi qoşunların Ukraynaya göndərilməsi barədə bəyanat verib.

Nazir Qvido Krozettonun sözlərinə görə, bu, "diplomatiya yolunu bağlayan birtərəfli eskalasiyaya addım" demək olacaq.