Əflatun Amaşov: “Jurnalist təşkilatları Bulvarda çəkilişə icazə verilməməsinə fikir bildirməlidir”

“Xalq qəzeti”nin baş redaktoru, Mətbuat Şurasının İdarə Heyətinin üzvü Əflatun Amaşov Dənizkənarı Bulvar İdarəsi tərəfindən televiziya kanallarının Bulvarda çəkiliş aparmalarına icazə verilməməsinə, Bulvar mühafizəçilərinin jurnalistlərin çəkilişinə maneə olmalarına münasibət bildirib.

Globalpress.az xəbər verir ki, Ə.Amaşov yerli
KİV- lərə müsahibəsində deyib ki, bu məsələ ilə bağlı jurnalist ictimaiyyəti, jurnalist təşkilatları öz fikirlərini bildirməlidirlər.

“Bulvarda dövlət əhəmiyyətli, dövlət sirri ilə bağlı müəyyən obyektlər varsa, həmin obyektlərin görüntülərinin çəkilməsinə, onun fonunda müsahibə verilməsinə dair qanunvericiliyə uyğun qaydada jurnalistlər müəyyən məhdudiyyətlərlə üzləşə bilərlər. Belə hal yoxdursa, jurnalist istənilən yerdə istənilən zaman müsahibindən müsahibə götürə bilər. Maneə törədilirsə, bunun üçün çıxış yolu var. Bildiyimiz kimi, qanunvericilikyə müəyyən yeniliklər edildi. İnzibati Xətalar Məcəlləsinə edilən dəyişikliklərə əsasən, jurnalist informasiya alarkən onun fəaliyyətinin məhdudlaşdırılması halında, əlbəttə, qarşı tərəf məsuliyyət daşıyır. Belə məqamda media təmsilçisi öz hüququnu bərpa etmək üçün məhkəməyə müraciət etməlidir”, - Ə.Amaşov bildirib.